Их Хурлын гишүүн, Байгаль орчин, хүнс, хөдөө аж ахуйн байнгын хорооны дарга Г.Баярсайхан тэргүүтэй УИХ-ын төлөөлөгчид айлчлав

Их Хурлын гишүүн, Байгаль орчин, хүнс, хөдөө аж ахуйн байнгын хорооны дарга Г.Баярсайхан тэргүүтэй, бүрэлдэхүүнд нь УИХ-ын гишүүн Д.Ганбат, Ц.Оюунбаатар болон Монгол-Чехийн найрамдлын бүлгийн дарга, УИХ гишүүн Ж.Батсуурь нар орсон Монголын Парламентын төлөөлөгчид 2013 оны 11 дүгээр сарын 21-24-ны өдрүүдэд БНЧУ-ын Парламентын дээд танхим болох Сенатын урилгаар тус улсад ажлын айлчлал хийв.

Айлчлалын хүрээнд төлөөлөгчдийг БНЧУ-ын Парламентын дээд танхим болох Сенатын дэд дарга хатагтай Алена Гаядушкова болон орон нутгийн хөгжил, төрийн захиргаа болон байгаль орчны байнгын хорооны дарга Иво Барек нар тус тус хүлээн авч уулзлаа.

Уулзалтуудын үеэр талууд хоёр улсын харилцаа, худалдаа, эдийн засаг, хөрөнгө оруулалт, эрчим хүч, уул уурхайн нөхөн сэргээлт, нийгмийн хамгаалал болон хөгжлийн хамтын ажиллагааны асуудлаар ярилцсанаас гадна бусад салбарын хамтын ажиллагааг идэвхжүүлэх, Монгол, Чехийн харилцаа, хамтын ажиллагааны өнөөгийн байдалд үнэлэлт дүгнэлт өгч, хоёр улсын цаашдын хамтын ажиллагааг хөгжүүлэхэд хууль тогтоох байгууллагуудын хамтын ажиллагааг идэвхжүүлэх, хоёр орны өндөр түвшний харилцан айлчлалын давтамжийг хадгалах нь чухал ач холбогдолтой гэдгийг онцоллоо.

Түүнчлэн хоёр тал Монгол улсын хөдөө аж ахуйн үйлдвэрлэлийн салбарт дэвшилтэт техник, технологийг Чехийн тусламжтайгаар нэвтрүүлэх ажлыг эрчимжүүлэх үүднээс үлгэр жишээ болохуйц хамтарсан зарим төсөл хэрэгжүүлэхээр тохиролцов.